ధనవంతుల కష్టాలు

అనుకుంటాంగాని ఎవరి బాధలు వారివి. మీకేం డబ్బుంది ఎలాంటి సమస్యలుండవు అనుకుంటారందరూ. మా బాధలు మీకేం తెలుసు అంటున్నారు. ఇంతకూ ఏమిటా బాధ?  జనం సొమ్ముతో బలిసిన ఒకశాతం ధనికుల వ్యవహారం అమెరికాలో అలాగే ఉంది. అక్కడ ఏడాదికి 75వేల డాలర్ల ఆదాయం వుంటే ఒక కుటుంబం గౌరవప్రదంగా బతకవచ్చు. అయితే న్యూయార్క్‌ మ్యాగ్‌జైన్‌, బ్లూమ్‌బెర్గ్‌ న్యూస్‌ ధనికుల కష్టాల గురించి ఈ మధ్య ఏకరువు పెట్టింది. ఒక బ్యాంకరు తనకు బోనస్‌గా లక్షా 25వేల డాలర్లు వస్తే దానిలో పన్నులు పోను 75వేల డాలర్లు మిగులుతాయి, దాంతో నా స్నేహితురాలిని మంచి రెస్టారెంట్‌కు తీసుకుపోవాలా? దానికి రానుపోనూ టాక్సీ కట్టించాలా? వీటన్నింటికీ ఈ మొత్తం ఎలా సరిపోతుంది మీరు చెప్పండి అని ప్రశ్నించాడు. మరొకడు మూడున్నర లక్షల డాలర్లు వచ్చినప్పటికీ ఇంట్లో అంట్లు తోమే మిషన్‌ లేదు, చేతులతో తోముకోవటం ఎంత కష్టమో మీకేం తెలుసు అన్నాడు. ఉన్న ఇళ్ల అప్పు తీర్చలేక ఇళ్లు పోగొట్టుకొనే వారికి ఇలాంటి వారిని చూస్తే మండదా మరి? న్యూయార్క్‌లో అపార్ట్‌మెంట్‌ కొనటమే గొప్ప. అలాంటిది పార్కింగ్‌ కూడా ఇంటిపైనే లేకపోతే ఎలా అని కొందరు చింతాక్రాంతులౌతున్నారట. పెంట్‌ హౌస్‌ పార్కింగ్‌ కోసమే ఎనిమిదిలక్షల డాలర్లు(మన రూపాయల్లో నాలుగుకోట్లు) చెల్లించేందుకు డబ్బున్న మారాజులు సిద్ధం అంటున్నారు. ఆసుపత్రికి వెళ్లి అప్పుల పాలు కావటం కంటే చావటం 'చౌక' అమెరికాలో ఎందరికో. అయితే కొందరికి రోగం గొప్ప భోగం. రోజుకు 2,400 డాలర్లు పోసి ఆసుపత్రి గదుల్లో ఉండే వారికి ఎప్పుడు కావాలంటే అప్పుడు సిద్ధంగా డ్రైవర్‌, బట్లర్‌, ఇతర సేవలు అందించేవారు సిద్ధంగా ఉంటారట. అయితే వారికి డాక్టర్లు, నర్సమ్మలూ అవసరం ఉండదా అని అమాయకంగా ప్రశ్నించేవారికి మనం ఏం చెబుతాం చెప్పండి. ఆసుపత్రిలో హోదాకు తగ్గట్లుగా ఉండాలనుకొనే వారున్నారీ రోజుల్లో మరి. ఎంత బిల్లయితే అంత ఘనత మరి.