2014 ఎలక్షన్లు లో.. పోటీ చెయ్యనున్న మంచు లక్ష్మి

టైమ్ బాగన్నప్పుడే మన అదృష్టాన్ని పరీక్షించుకోవాలి కదా. అదే చేస్తోంది మంచు లక్ష్మి. మోహన్ బాబు కూతురిగా తెలుగువాళ్లకు సుపరిచితురాలైన లక్ష్మి... విదేశాల్లో చాలా సీరియళ్లలో నటించింది. ఆ సీరియళ్లు ఎప్పుడు ప్రసారమైనా... ఆ జీతం చెక్కులు ఇప్పటికీ ఆమెకు వస్తుంటాయట. అలా రచ్చగెలిచిన లక్ష్మి ఇంట గెలిచే ప్రయత్నం చేసింది. టీవీ షోల ద్వారా తెలుగు ప్రేక్షకులకు దగ్గరైంది. టీవీ షోల ద్వారా... సినీ దర్శకుల దృష్టినీ ఆకర్షించి... సినిమాల్లోకీ అడుగుపెట్టింది. కేవలం నటనతోనే సరిపెట్టుకోలేదు. నిర్మాణ రంగంలోకీ అడుగుపెట్టింది. చేతులు కాలినా... ఫర్వాలేదనిపించుకుంది. ఇలా తెలుగు ప్రజలకు బాగా పరిచయమైన లక్ష్మి ఇప్పుడు రాజకీయాల్లోకి అడుగుపెట్టాలనుకుంటోంది. నిజానికి ఈ ఆలోచన ఆమెది కాదు. వాళ్ల నాన్న మోహన్ బాబుది. ఇటీవలి కాలంలో అటు కూతురి సినిమాలూ, ఇటు కొడుకుల సినిమాలూ కలిసిరాకపోవడంతో ఖాళీగా, ఫెయిల్యూర్లను చవిచూస్తున్న ఆయన... కనీసం రాజకీయాల్లోకి వెళ్లి ఒక సీటు రిజర్వు చేసుకుందామనుకున్నారు. కానీ, తాను వెళ్తే లాభం లేదనుకుని... అందరికీ పరిచయమైన తన కుమార్తెను అడుగుపెట్టించాలని చూస్తున్నారు. ఇందుకోసం తెలుగు దేశం పార్టీ నుంచి ప్రయత్నాలు మొదలుపెట్టారు. తన కుమార్తెకు ఎమ్మెల్యే సీటు ఇవ్వాలని కోరారట. తెలుగుదేశం స్పందన ఏంటో ఇంకా తెలియరాలేదు. ఎలక్షన్లు చాలా దూరం ఉన్నాయి కాబట్టీ... త్వరలోనే ఆ స్పందన తెలుస్తుంది అంటున్నారు రాజకీయ విశ్లేషకులు.